Proverbs 3

Eminye Njalo Imivuzo Emihle Yokuhlakanipha

1Ndodana yami, ungakhohlwa imfundiso yami, kodwa ugcine imilayo yami enhliziyweni yakho,

2ngoba izakwandisa impilo yakho okweminyaka eminengi, ikuphe impumelelo.

3Akungasuki kuwe loba nini uthando lokuthembeka; kubophele entanyeni yakho, ukubhale egwalibeni lenhliziyo yakho.

4Ngalokho uzathandeka uzuze igama elihle emehlweni kaNkulunkulu laphambi kwabantu.

5Themba kuJehova ngenhliziyo yakho yonke, ungathembi okwakho ukuzwisisa;

6mvume kuzo zonke izindlela zakho, yena uzaqondisa zonke izindlela zakho.

7Ungazenzi ohlakaniphileyo ngokubona kwakho; yesaba uJehova uxwaye okubi.

8Lokho kuzawuphilisa umzimba wakho kuwaqinise lamathambo akho.

9Dumisa uJehova ngemfuyo yakho; ngezithelo zakho zokuqala zonke;

10ngalokho iziphala zakho zizagcwala ziphuphume, lezimbiza zakho zewayini zize zichitheke ngewayini elitsha.

11Ndodana yami, ungeyisi ukulaya kukaJehova njalo ungacaphukeli ukukhuza kwakhe,

12ngokuba uJehova ulaya labo abathandayo, njengoyise elaya indodana yakhe ayithandayo.

13Ubusisiwe umuntu ozuza ukuhlakanipha, umuntu ozuza ukuqedisisa,

14ngoba khona kulenzuzo eyedlula isiliva lembuyiselo eyedlula igolide.

15Kuligugu elidlula amarubhi; kakukho okuloyisayo okungalinganiswa lakho.

16Impilo ende isesandleni sakho sokunene; kwesokhohlo kulenotho lodumo.

17Izindlela zakhe zilokuthokoza, lemikhondo yakhe ilokuthula.

18Kuyisihlahla sokuphila kulabo abakwamukelayo; labo abakuphathayo bazabusiswa.

19Ngokuhlakanipha uJehova wabeka izisekelo zomhlaba, ngokuqedisisa wamisa izulu endaweni yalo;

20ngolwazi lwakhe izilwandle zehlukaniswa, lamayezi athontisa amazolo.

21Ndodana yami, gogosa ingqondo ehlela ngolwazi, ungayekeli kukucatshele;

22kuzakuba yikuphila kuwe, kube ngumceciso omuhle entanyeni yakho.

23Lapho-ke uzahamba ngendlela evikelweyo unyawo lwakho lungakhubeki;

24nxa ulala kawuyikwesaba; uzalala ubuthongo obumnandi.

25Ungabi lovalo nxa ujunywa ngumonakalo kumbe yikubhidlika lokho okwehlela ababi,

26ngoba uJehova uzakuba lithemba lakho avikele unyawo lwakho emjibileni.

27Ungaze wala ukusiza labo abadinga uncedo, wena ulakho ongabasiza ngakho.

28Ungabokuthi kumakhelwane wakho: “Ubobuya kwesinye isikhathi; ngizakunika kusasa” – wena ulalo lololutho.

29Ungacebi okubi ngomakhelwana wakho, ohlezi lawe ekwethemba.

30Ungaxabani lomuntu kungelasizatho – yena engakonanga ngalutho.

31Ungamhawukeli umuntu othanda ukulwa loba nje ufise lakuphi ukwenza kwakhe,

32ngokuba uJehova uyamenyanya umuntu oxhwalileyo kodwa oqotho umbeka ekhwapheni lakhe.

33Isiqalekiso sikaJehova sehlela endlini yababi, kodwa uyayibusisa indlu yabalungileyo.

34Uyabahleka usulu abayizideleli ezizithembayo, kodwa abaphe umusa abathobekileyo.

35Abahlakaniphileyo baphiwa udumo kodwa abayiziwula ubathela ihlazo.